【Emily】匯豐恒生侍產假增至40日 產假有20周

【明報專訊】陸續有銀行增加僱員有薪侍產假，繼渣打銀行（香港）喺今年8月公布後，噚日就到匯豐銀行同恒生銀行，由明年1月1日開始，其員工嘅有薪侍產假將會大幅增加3倍，由10日增至40日，有薪產假就由16個星期增至20個星期。

除咗增加有薪侍產假同產假外，匯豐同恒生嘅員工原本每月可以有兩個鐘「額外休假時段」，之後也會加碼至每月4個鐘，等員工可以彈性地調配時間照顧家人同處理個人事務。

匯豐香港區行政總裁林慧虹話，唔少員工都要肩負家庭照顧者嘅重任，作為家庭友善嘅僱主，深信當員工感受到支援時，會對工作更投入，效率亦會提升。恒生就話員工係重要資產，關心員工福祉，會不時檢視福利政策，為員工提供健康平衡嘅工作環境。