【Emily】澳門大搞夜經濟 賽狗空地設溜冰場

【明報專訊】香港政府近月大搞夜經濟，澳門都唔例外，澳門旅遊局趁年底起節日旺季，連續86日舉辦多項大型夜間活動等，其中聽日（9日）開始至明年1月14日期間嘅每個周六、周日，喺逸園跑狗場戶外空地會開設仿真冬日溜冰場，現場仲會有天幕燈飾、幻影遊樂場、親子工作坊等活動，開放時間為晚上7點至10點。

旅遊局今次同當地六大綜合度假休閒企業合作，喺澳門半島、氹仔、路環等7個區設數十個燈光裝置、光雕表演、互動裝置等，噚日澳門新聞局喺社交平台就形容係要「發揮聯動效應」，促進社區旅遊同夜經濟發展。

叫「藝術外賣」 食物表演送面前

除咗設大量燈光「打卡」位，澳門當局仲有個新玩法叫「Light Up！藝術外賣」，本周末（9至10日）同下周末（16至17日）嘅晚上6點至11點，透過指定外賣平台「澳覓」揀選「藝術外賣」下單叫外賣，食物同結合燈光元素嘅藝術表演就會喺預約時間內送到，但外賣地點就要係旅遊局設燈光裝置嘅地點。