【Emily】時新漢堡「再結業」 「期待未來再見」

【明報專訊】「時新漢堡飽」有唔少捧場客，如鍾意其招牌漢堡芝士蛋包、食漢堡包必配嘅「時新醬」及波浪坑紋炸薯條。該店噚日喺facebook宣布，因租約期滿結業，最後營業日係本周一（4日），文末提到「我們期待未來再見」，未有提及會唔會擇地重開。Emily噚日打過畀時新，聯絡唔到對方。

位於紅磡嘅「時新漢堡飽」前身為「時新快餐店」，由時新漢堡飽老闆鍾奇濤嘅爸爸鍾冠球喺1960年代創立，係全港首間引入漢堡包嘅快餐店，不過因家族糾紛及區內重建關係，喺2017年8月結業。隨後鍾奇濤喺2018年3月以「時新漢堡飽」名義喺黃埔重開；而哥哥鍾奇清就喺同年8月於紅磡蕪湖街以「SHKB1963」名義重開，不過該店已於2021年結業。