【Emily】鴛鴦概念融Cocktail 港調酒師獲3獎

【明報專訊】香港茶餐廳特有飲品「鴛鴦」唔止好飲，仲可以揚威海外。香港康得思酒店酒水經理及Alibi-Wine Dine Be Social首席調酒師高爾澳（Leo Ko）近日代表香港，參加「世界雞尾酒大賽2023」（World Cocktail Championship 2023），並將「鴛鴦」蘊含港式奶茶、咖啡嘅概念融入雞尾酒，贏得「年度世界調酒師」、「年度雞尾酒（低酒精度類別）」同埋「最佳感官技巧」3個獎項，成為首位贏得多項重要獎項嘅香港代表。

赴意參賽 盼引當地咖啡文化共鳴

賽事於上星期喺意大利羅馬舉行，合共60多個國家或地區嘅調酒師參賽。比賽經3輪遴選，由60多名調酒師脫穎而出嘅3人參加終極超級決賽，過程當中包括低酒精度預賽、調酒賽等測試。

Leo以FABBRI氈酒、自家製Campari冷泡咖啡及伯爵茶、Monin雲呢拿糖漿、熱情果氣泡同埋FABBRI特製酒香車厘子，喺決賽中調製名為「Way To Tropical Paradise」嘅雞尾酒。Leo喺賽後話，「鴛鴦」係深受港人歡迎嘅日常地道飲品，佢嘗試透過捕捉其精髓並重塑成雞尾酒；同時藉此引起意大利咖啡文化嘅共鳴。