【Emily】中大政政系重組 學生主場諮詢會告吹 院長離港唔出席 關注組改網上調查

【明報專訊】中文大學政治與行政學系正值重組，校方將政政系同全球研究、數據科學與政策研究課程組成一個新學院，但一直有學生代表擔心政政系日後角色被矮化。「政政合併關注組」日前喺Instagram宣布搞學生主場諮詢會，但因為社會科學院院長趙志裕離港唔會出席，諮詢會決定取消。關注組噚日改為做網上問卷調查，了解持份者係咪支持改組、校方諮詢係咪足夠等，下周一（4日）晚截止，希望趕及下周三（6日）校方開教務會時，喺會上討論調查結果，同時希望校方暫緩改組。

關注組促再諮詢 校方：去年已做

政政系會內務副主席冼卓言同Emily講，重組方案嘅透明度及解說工作都唔夠，下星期喺教務會討論太倉卒，希望校方做更多諮詢。關注組代表關靖豐就話，校方專責小組交畀教務會嘅重組方案係保密，同學無從得知有幾多細節最終會「扑槌」。

Emily噚日問中大最快幾時完成重組方案、關注組要求暫緩係咪可行，校方無正面回答，但提到上年5至6月初已做為期6周嘅「大規模諮詢」，約見各課程教職員及同學，講解重組計劃同聽取意見，重申新學院係行政架構，成立目的係透過協同效應，為各課程帶嚟更多教學及研究資源等。