【Emily】田二少重遊迪園有讚有彈 40分鐘買爆谷耐過排遊戲

【明報專訊】迪士尼樂園新園區「魔雪奇緣世界」上個月20號正式開幕，立法會議員田北辰噚日喺facebook分享上個周末同一班孫仔孫女去迪士尼玩嘅經歷，佢話覺得迪士尼服務好咗，但就發現園區人手不足，夜晚買爆谷等咗成40分鐘。

讚角色扮演者「有求必應」

田北辰話Frozen園區特別受歡迎，仲引述工作人員話，通關後多咗好多人嚟，Frozen開咗之後更加多，尤其係美、日、台嘅粉絲。佢話樂園多咗投資，服務都好咗，以前佢去樂園餐廳食飯，角色扮演者都只係行過嚟影張相就算，但今次去就好樂意滿足遊客嘅需求，「有求必應」，覺得新總裁都放咗好多心機提升服務質素。

不過，佢話都有掃興嘅一刻，當晚6點諗住買爆谷食，點知得美國小鎮大街附近有得賣，結果等咗成40分鐘先買到，仲耐過等玩機動遊戲。佢話一啲人流多嘅區域應該加多啲人手，仲話有將情况拍低，傳畀樂園總裁睇吓佢點處理。