【Emily】加快灣區安老議案通過 「真長者」龍漢標有喜有憂

【明報專訊】立法會噚日喺在席大比數議員支持下，通過由民建聯議員李世榮提出嘅「加快落實粵港澳大灣區跨境安老規劃」無約束力議案。經民聯地產及建造界議員龍漢標發言時話，佢作為一個貨真價實嘅長者，贊成完善跨境安老規劃畀到長者多一個選擇，但係擔心如果加快跨境安老，會唔會多咗港人北上探親同消費，更大打擊本地經濟。

憂子孫北上探親挫本地市道

龍漢標關注好多年輕家庭未必同年長父母一齊住，多數都係過時過節、長者生日，先可以兩代或三代同堂，同父母、祖父母飲茶食飯、一齊購物消遣。當愈嚟愈多老友記到內地居住，可能都會令佢哋嘅子孫同親友多咗返內地。

龍漢標話，留意到?家已經有唔少港人喺周末同假期北上消費，對本地消閒娛樂同餐飲購物嘅生意造成負面影響，擔心一旦加快跨境安老，對本地經濟，特別係餐飲業同零售業會造成更大打擊。

龍漢標促請政府考慮完善跨境安老規劃嘅同時，應該更加積極振興本港經濟，避免完善跨境安老之後引發本地消費流失嘅問題，造成顧此失彼嘅局面。