【Emily】《香港志．自然》「助了解香港地香港人由來」

【明報專訊】香港地方志中心噚日舉辦《香港志．自然》出版典禮暨環境生態論壇，環境及生態局長謝展寰、中聯辦宣傳文體部副部長張國義等30名嘉賓獲邀共同主禮。中心話呢本書全方位介紹香港自然生態以及香港同國家「一脈相連」嘅歷史源流，可以幫助市民深入了解「香港地」同「香港人」嘅由來。

至於環境生態論壇，就請來環境科學家、非政府組織代表、企業家同商界組織代表，就環境治理嘅政策措施，以及環境、社會和管治（ESG）議題展開兩場討論。謝展寰致辭時趁機宣傳政策，除咗提及明年會喺沙頭角紅花嶺一帶設立第25個郊野公園，北大嶼會設第8個海岸公園，仲話發展北部都會區，都會積極推進各項自然保育項目。

全書約有140萬字，由67名專家學者領銜撰寫及擔任評審。書分為五卷四冊，係香港地理與環境嘅叢書中首次結合自然科學同人文歷史，以「全景方式」記錄從古至今香港嘅地區概况、人口、自然環境、自然資源與生態、環境保護與生態保育嘅發展歷程同演變。