【Emily】張宇人：港乏活鴨鵝鴿入饌 粵菜失色

【明報專訊】飲食界立法會議員張宇人噚日提出口頭質詢，關注當局會唔會因應禽流感對本港嘅風險已相對減低，而考慮與內地部門商討，容許適量活鴨、鵝和乳鴿等家禽供港，同時容許本地農場適度飼養鴨、鵝和乳鴿等家禽。佢指本地食肆嘅廣東菜因未能以上述新鮮家禽入饌而失色。

鄧家彪關注點樣「食雞有雞味」

不過，工聯會鄧家彪關注雞多啲，話好多港人北上時鍾意食雞，或者喺內地買鹽焗雞返港，希望政府思考，為港人健康風險把關同時，點樣令港人「食雞有雞味」。目前無活雞進口本港，而據漁護署資料，噚日（29日）本地活雞供應有11,650隻。

能否復供港？ 謝展寰：禽流風險 不改現行做法

環境及生態局長謝展寰回應張宇人時，引述衛生防護中心於2004年至今年10月期間，錄得29宗人類感染禽流感個案，當中有5宗死亡個案，表明禽流感風險仍在，目前無計劃向內地提出恢復活水禽供港要求。

謝展寰又引述，有國際禽流感專家指出，水禽可成為不同禽流感病毒株嘅基因混合媒介，因此政府無計劃容許本地農場飼養水禽。佢仲話，好多內地朋友認為香港食到嘅鹽焗雞都好有特色，認為好多餐廳仲做到香港作為美食之都嘅地位。