【Emily】劉澤星「坐正」港大醫學院長

【明報專訊】港大校委會噚日通過正式任命劉澤星做醫學院院長，任期下月1日展開，為期5年。港大校長張翔噚晚向師生發電郵公布，話劉澤星憑住傑出背景同領導經驗，將帶領醫學院喺區域同全球學術同專業方面取得優異成績。

劉澤星發聲明話對任命深感榮幸同欣喜，將全力以赴，引領學院喺提供卓越教學、吸納優秀教研專才同學生、推動研究等方面邁進，為醫學領域嘅未來貢獻。佢舊年獲張翔推薦暫任港大醫學院長，接替離開港大嘅梁卓偉。

張翔喺電郵形容劉澤星喺本地同國際風濕病學領域擁有崇高學術地位，亦曾擔任港大醫學院多個領導職務。佢亦喺電郵公布校委會通過任命David Srolovitz做工程學院院長。

本報之前引述消息報道，港大舊年中揀選獵頭公司負責遴選醫學院院長，文件列明期望具備「美國高等院校經驗」；最後3名院長候選人分別係劉澤星、美國匹茲堡大學外科教授Timothy Billiar、港大兒童及青少年科學系系主任梁永恆。