【Emily】勞處招聘會供職4500個 年長求職者較多

【明報專訊】勞工處噚日同今日喺北角社區會堂搞「求職新路向招聘會」，提供逾4500個職位，包括侍應及保安員等，截至噚日4時45分共有765人入場。Emily朝早入場睇過，發現普遍求職者年紀偏高，人流唔算多。40多歲嘅聶先生話之前從事服務行業，因家庭出現問題，失業約兩個月，希望搵份全職保安員工作。佢參加過勞工處舉辦嘅招聘會，認為今次位置稍偏遠，但「至少有工搵吓」。

聲稱今日拎香港身分證嘅內地人、24歲嘅伍先生話，來港前喺南寧嘅大學修讀計算機科學，目標搵研發人員等相關工作，不過場內無合適職位，佢就用勞工處嘅空缺搜尋終端機搵有無其他工。

院舍長期缺人 稱倘百人應徵可請晒

匯寶醫療用品配套有限公司顧客服務職員彭小姐話，噚日早上一個半鐘內收到3份履歷，雖然應徵者年齡偏高，但擁有相關經驗先係主要考慮。公司有請保健員、護士等，佢話安老院人手長期短缺，仲話如果有100個應徵者「我都可以請晒」。

YMCA人力資源助理李小姐就話，噚日早上一個鐘內收到兩份履歷，分別應徵全職洗碗員同行李服務員，形容反應唔錯，又話公司參加過其他招聘會，認為今次人流較冷清。