【Emily】深水埗共融遊樂場 旋轉滑梯康署轄下No.1

【明報專訊】康文署轄下嘅深水埗公園兒童遊樂場改建為共融遊樂場，噚日起開放畀公眾使用。新遊樂場佔地約6400平方米，較原有面積增加4倍以上，設置多種類型嘅鞦韆及唔同高度嘅滑梯，其中位於「沙丘地堡」主題區嘅攀爬塔連接高逾6米及長逾13米嘅旋轉滑梯，係康文署轄下遊樂場最高及最長嘅滑梯。Emily趁周日下晝去睇吓，公園好熱鬧，有過百個小朋友喺度玩，玩滑梯要排長龍，但見佢哋都玩得好開心。

康文署話，新遊樂場屬公共遊樂空間改造計劃一部分，設計採納市民以「大自然主題」為設計概念嘅意見，以「沙」、「植物」、「水」為主要設計元素，分別設有「沙丘地堡」、「森林草原」及「綠洲噴泉」3個主題區。

新遊樂場除咗設置鞦韆同滑梯，亦設置攀爬繩網、敲擊樂管和鼓、健身區，仲有可供輪椅使用者享用嘅氹氹轉同彈牀等。康文署話，使用者可按其能力及喜好選擇遊樂設施，並促進長幼、傷健及社會融合。