【Emily】毅行43小時 陳皓桓憶獨行麥徑獄中人

【明報專訊】「樂施毅行者」上周五展開，前民陣召集人陳皓桓（Figo）、社民連前主席黃浩銘同社運人士葉寶琳等組隊參加，用咗約43小時完成100公里路程。Figo話參與毅行者期間一直諗起因理大暴動入獄嘅YouTuber易卓邦，話對方曾經獨自行完麥理浩徑，感覺好似一齊行山咁。

2583人完成 最慢46小時45分

今屆毅行者有逾3000人參加，參與者4人一隊要喺48小時內完成100公里路程，橫跨整條麥理浩徑，活動噚日結束，2583人完成整段路程。最快完成嘅隊伍用咗12小時42分鐘，最後一支隊伍以46小時45分行完。

Figo同隊友噚日早上衝線，佢喺facebook話每次訓練同正式參與都好辛苦，連續兩晚行山令膝頭同腳感到疼痛，由天氣熱變凍到震，凍又變番熱到濕透，少啲毅力都無法完成。完賽後佢話終於可以瞓覺同飲酒。

另外，社民連多名成員同義工收到警方傳票，被控4月至5月期間3次於銅鑼灣擺街站時未經批准籌款、展示招貼或海報，今日上庭應訊。社民連噚日話，成員只係喺街站掛黑布，亦無呼籲籌款，認為當局檢控屬打壓政治團體生存空間。