【Emily】「追女仔」形容搶人才 林健鋒：我靚仔啫，都要畀人知內涵

【明報專訊】立法會噚日繼續辯論《施政報告》致謝議案，當討論到「不斷增強發展動能」範疇時，商界（第一）議員林健鋒就用「追女仔」嚟形容政府搶人才嘅情况，話只係有誠意唔足夠，要有實際行動展示魅力同過人之處，畀人睇到香港繁榮嘅一面，同睇到宜居、宜業等樣貌，令人願意喺香港落地生根，「就好似我靚仔啫，都要畀人知道我有內涵先得」。

黃俊碩「皇帝女」形容香港

林健鋒所屬嘅經民聯早前建議政府樓市全面「撤辣」，佢話近來接二連三有住宅地流標，影響市民入市信心；仲話?家唔少父母用仔女身分買樓，加按舊物業套現，幫仔女上車，樓市一旦出事就會累及兩代，建議政府應要觀察樓市情况。

會計界議員黃俊碩就提到，過往唔少人覺得香港係「皇帝女唔憂嫁」，認為香港有發展前景優勢，仲係「皇帝女」，但現時全球愈來愈多「皇帝女」，話香港只係靚唔夠， 要學富五車、十八般武藝先可以吸引到其他人，「否則皇帝女都好大機會嫁唔出」，認為政府喺制定政策上要大膽啲。