【Emily】新人大帽山持煙花影婚照 環團轟無知又自私

【明報專訊】環保團體「綠惜地球」噚日喺facebook上載一段市民提供嘅片段，片中遠處有手持煙花嘅人影緊婚紗相，火花隨風飄揚，引來不少網民批評。綠惜地球亦批評有關舉動「無知又自私」，仲好容易引起山火，呼籲各新人同攝影師保護大自然。漁護署回覆Emily，確認拍攝片段地點係大帽山郊野公園範圍，又提到郊野公園範圍內，只可於指定露營地點或燒烤地點生火或用火，否則即屬違法，一經定罪最高可被判罰款5000元及監禁1年。

漁護署話，就片段的情况至今無接獲市民舉報，但接到傳媒查詢後，已經喺事發地點張貼警告，提醒人有關喺郊野公園生火嘅管制，亦會繼續跟進事件；又話職員巡邏郊野公園時若發現有人違反《郊野公園及特別地區規例》，會採取適當執法行動。

片段所見，拍攝者一度大叫「小心山火喎」、「好危險㗎喎」，嘗試叫停拍攝。綠惜地球話，未經許可燃放煙花不止犯法，近日天氣乾燥，加上現場遍地長草，火舌好易引起山火，呼籲各新人同攝影師喺郊野取景都要保護大自然，唔好為影相而破壞環境，令其他人失去靚景。