【Emily】跨海鐵路 田北辰轟有議員唔畀喺財會再傾

【明報專訊】實政圓桌田北辰上周做完右眼白內障手術後，本周二做埋左眼，噚日包住紗布出席立法會工務小組委員會會議，議程之一係討論龍鼓灘填海和重新規劃屯門西地區嘅規劃及工程研究，佢不滿政府規劃第五條跨海鐵路時未承諾延伸至屯門碼頭。不過佢同Emily講更不滿嘅係，當佢要求項目提交財委會時要進一步討論有關工程時，有5個議員舉手反對，唔畀喺財委會再傾。

睇番片段，除田北辰外，新界西南議員陳穎欣同選委界何君堯都有舉手贊成項目交去財委會時再進一步討論工程，投反對票嘅有自由黨易志明、李鎮強，經民聯龍漢標，選委界陳紹雄同林筱魯。田覺得若其他人認為毋須再討論，大可喺財委會討論時唔出聲，但提出反對就令其他人無得討論，反問係咪屯門50萬居民嘅議題唔關佢哋事，就唔畀人講。

至於跨海鐵路工程，田二少話爭取走線延至屯門碼頭，由屯門碼頭出發往三聖，沿小欖過海到欣澳，再經交椅洲到港島西，以照顧區內人口，並解決屯馬線迫爆問題，但今屆政府提出走線唔經屯門碼頭一帶。政府噚日話要睇數據先可再決定，現難有具體承諾，強調將來會唔會起鐵路經小欖延線至屯門碼頭，都要顧及善用公帑原則。