【Emily】文化古蹟資源中心與長春社「分家」

【明報專訊】本港老牌環團長春社噚日喺社交網站發聲明，內容係同位於西環嘅「長春社文化古蹟資源中心」分道揚鑣。聲明指資源中心於前晚（21日）舉行嘅會員大會上通過修改公司約章，使其管治及運作獨立於長春社，並改名刪去「長春社」，變為「香港文化古蹟資源中心」，該中心理事會任命和組織所有運作即時與長春社無關。

聲明無交代資源中心同長春社「分家」原因。有資源中心中人同Emily講，中心於1980年代由長春社中人創立，當時叫做「香港環境中心」，到2005年改名為「長春社文化古蹟資源中心」，主要推動保育古蹟、文化及歷史，但話中心與長春社一直各自運作，而中心最近引入具建築師背景嘅成員，想更聚焦推動保育歷史建築，所以想釐清與長春社之間嘅關係，強調並非改組，中心約10名員工亦無變動。至於改名後嘅「香港文化古蹟資源中心」，主席仍然係黎穎詩。

中心位於西營盤西邊街西區社區中心後座，於1909年建成，現時被列為二級歷史建築。