【Emily】星洲旅局來港吸客 辦市集超現實展覽

【明報專訊】新加坡係港人熱門旅遊地之一，今年首10個月就有約26.7萬名香港人入境，相當於2019年同期嘅三分之二。新加坡旅遊局噚日起喺尖沙嘴K11購物藝術館舉辦一系列活動吸客，包括周末市集同展覽等，畀港人唔使搭飛機都體驗到當地特色。

6新加坡品牌負責人分享故事

有無見過新加坡地標星耀樟宜嘅「雨漩渦」喺維多利亞港出現？又或者熱門景點擎天樹喺香港舉行燈光表演？呢啲天馬行空諗法?家統統可以實現。人氣社交媒體專頁「SurrealHK」主打超現實作品，新加坡旅遊局今次就邀請咗呢位藝術家兼攝影師Tommy Fung創作3幅融合星港兩地特色嘅作品，將天星小輪、維港、彩虹邨等本地元素，同新加坡嘅建築融入其中，突破創意界限，畀參觀者打卡影相。

至於周末市集同樣吸引，除咗有飾物、花茶、皮革、香薰、護膚品、特式小食等產品出售，仲有遠道而來嘅6名新加坡品牌負責人，向港人分享佢哋嘅品牌故事。

推廣活動即日起至11月26日（周日）舉行。