【Emily】包致金同外孫出繪本 騷鱷魚紙雕 話維護治安亦要履行正義

【明報專訊】近年不時講解法治概念嘅終審法院非常任法官包致金，噚日喺中大法律學院舉辦嘅新書講座中，講解法治同正義概念。佢提到，詮釋憲法時需要忠誠履行法律行文同背後嘅精神，同埋尊重人民意願，先係最能夠達至安全且自由嘅社會。佢提醒，維護治安嘅同時，都需要履行法律同正義。

包官喺兩個寶貝外孫Asher同Zane面前感觸咁話，自己20多年私人執業，同埋做咗30幾年法官，自己做咗份內事依法維護司法公義，希望孫仔呢一代會仁慈評斷，並繼續改善法治。

包官過去出咗多本繪本，以卡通鱷魚為主角，透過淺白方式講解法治概念，佢今次再下一城，同兩個外孫一齊出第五本繪本。噚日喺新書講座，仲擺咗包官手整嘅鱷魚同動物紙雕。據Emily了解，呢啲紙雕都係包官以報紙濕水整出嚟，之後再上色，少啲心機都唔得。

英倘退歐人權公約「唔影響香港」

全球法律界呢期大事，係關注英國會唔會為求將難民轉送盧旺達而退出歐洲人權公約。包官同Emily講，事件非常不幸，但係即使英國真係退出公約，香港都有《人權法案》同《基本法》，過去本地案例都處理過歐洲人權公約框架，認為唔會影響香港。