【Emily】迪士尼「魔雪奇緣世界」開幕 陳茂波：料可吸更多旅客來港

【明報專訊】香港迪士尼歷時7年興建、喺呢一年都不斷預熱緊嘅全球首個「魔雪奇緣世界」主題園區噚日正式開幕，吸引大批fans捧場，上晝11點左右開園時，排喺前排嘅人衝入園區，成為第一批體驗魔雪奇緣嘅賓客。人群中Emily睇到有人著住電影主角Elsa嘅標誌藍裙，有人戴住Olaf嘅公仔頭飾，有人攞住其他迪士尼角色公仔。到中午左右，「魔雪奇幻之旅」項目預計排隊時間已經要70分鐘。

財政司長陳茂波都有參加歡迎禮，波叔話好開心《魔雪奇緣》電影系列中嘅阿德爾王國變成現實，話今次新園區開幕對香港迪士尼係非常關鍵嘅時刻，相信可以將迪士尼提升到全新層次，亦相信新園區可吸引更多旅客來港。佢提到新園區嘅獨特之處，係融合咗大嶼山嘅自然景觀，又運用先進科技，為旅客提供一個全新體驗。波叔仲同文體旅局長楊潤雄及迪士尼高層遊玩園區設施。

魔雪奇緣世界呈現咗迪士尼動畫電影《魔雪奇緣》（Frozen）中嘅阿德爾城堡、友誼噴泉、冰雪皇宮等場景，遊客玩新增機動遊戲「魔雪奇幻之旅」時，可以坐喺木船駛入電影中嘅場景；另一新遊戲「雪嶺滑雪橇」就可以睇到園區同大嶼山景色。