【明報專訊】立法會選委界別議員陳月明噚日戴住頸箍出席立法會一個小組委員會會議，行動略有不便。佢同Emily話，上周五到鄉村落區時不慎跌倒拉傷頸部，醫生建議佢戴頸箍觀察一星期，同時保護頸部。佢話近日都推卻需要外出嘅活動，希望爭取時間治療同休息。
身兼打鼓嶺鄉委會主席嘅陳月明上周五到鄉村落區，佢話因為路面凹凸不平，唔小心跌倒受傷，又引述醫生指其頸部受傷可大可小，所以要戴住頸箍，佢話頸部一直「扯住扯住」，睇咗中醫同做針灸後已好番好多。
陳月明話，除咗立法會會議，近日已推卻部分會議同活動，盼爭取更多時間治療休息，區選臨近工作繁重，身體要盡快康復。
