【Emily】伊院60周年嘉年華 細路可做一日醫護

【明報專訊】今年係伊利沙伯醫院成立60周年，該院一班醫護下月3日會喺尖沙嘴九龍公園舉辦「社區健康嘉年華」，到時仲提供迷你醫生同護士制服畀小朋友試著，化身「小小醫護」打卡留念，亦可以參加模擬工作坊體驗傷口縫針同護理等工作。

唔同專科嘅醫生、護士同專職醫療人員準備咗超過20個遊戲攤位，急症室、兒科、內科、腦神經科同深切治療部等部門，會透過賽車、虛擬實境（VR）等遊戲推廣預防中風等健康資訊。現場並提供血壓等基本健康檢查、諮詢同中醫義診，亦有社區團體表演弦樂、軍鼓、唱歌、空手道同無伴奏合唱。

嘉年華當日上午11點半至下午5點喺九龍公園廣場舉行，免費入場，參加者可獲得一張「Q版員工證」，而參加攤位遊戲獲得指定數量貼紙後，可以拎到伊院60周年限量禮品。