【Emily】觀塘「麥當勞叔叔之家」 66房服務病童

【明報專訊】麥當勞叔叔之家觀塘家舍噚日正式投入服務。呢棟16層高大樓，向患嚴重疾病嘅小朋友同佢哋屋企人提供一個「臨時家園」，共有66間房，預計每年為病痛家庭提供2.4萬個住宿晚上。

家舍內雖然冇麥當勞叔叔，但有Lego玩具、互動投影設備、火車模型，仲有埋健身室、音樂室、親子圖書館等共享空間，可以畀病童家庭發展社交，汲取朋輩力量，?家已有11個家庭入住。

穿梭巴士往返兒童醫院

觀塘家舍距離香港兒童醫院10分鐘車程，設有穿梭巴士往返醫院。香港麥當勞叔叔之家慈善基金董事會主席黃馮慧芷話，觀塘家舍鄰近香港兒童醫院，方便重病兒童家庭往返醫院；觀塘家舍主要服務需接受長期治療同需經常往返醫院嘅病童，要經醫務社工轉介，醫務社工會根據病童家庭經濟狀况、住址同醫院嘅距離、治療時長等因素計分。

觀塘家舍每間病房要收每晚100元行政費。50間普通房間同10間無障礙房間面積均大約200平方呎，每間可住4個人；另有6間隔離病房，係專為骨髓移植病童而設嘅套房，有獨立廚房、客廳等，每間面積約300呎，可住3個人。