【Emily】發哥跑半馬「被打卡」 彭韻僖唔執輸

【明報專訊】港珠澳大橋香港段半馬拉松活動噚日舉行，有逾8000跑手參加，都算係全城盛事。活動焦點之一一定係參賽嘅影星周潤發（相關新聞刊C2），因為佢沿路成為參加者及工作人員「集郵」目標，現場所見，連在場支援活動嘅義務工作發展局嘅主席、律師會前會長彭韻僖，都變咗小粉絲，見到佢都唔執輸以發哥做背景「打卡」留念。

逾250義工助登記報到人流控制等

今次活動要動員唔少人支援，包括有唔同政府部門嘅人員任義工。義務工作發展局就話，今次同中國香港田徑總會合作，為港珠澳大橋開通後首辦嘅大型跑步賽事協助招募，同統籌活動當日跑手登記報到及人流控制等義工服務，逾250名義工來自唔同紀律部隊、政府部門、機構團體等。海關就話，義工噚日天未光已經喺機場亞洲國際博覽館集合，佢哋負責為跑手戴上識別手帶，等跑手可以進入禁區參賽。‍

今次賽事由中銀香港贊助，而任職中銀嘅立法會選委界別議員簡慧敏亦有到場，見到佢落力為參加者打氣，並負責喺終點站為冠軍跑手拉衝線帶，佢形容見證肯尼亞選手衝線一刻極其興奮。