【Emily】毅行者月底辦 七成新人

【明報專訊】「樂施毅行者2023」將喺本月24至26日舉行，參加者要喺48小時內完成全長約100公里嘅路徑，起點位於西貢北潭涌，主要沿麥理浩徑行去終點屯門國際十字路會。樂施會噚日宣布，截至本月15日已有850隊逾3000人參加。Emily睇番資料，疫情前、2018年毅行者有4228人完成100公里賽事。樂施會解釋，因上年賽事延至今年2月舉行，相信分薄咗今次參加人數。

樂施毅行者督導小組召集人陳智思致辭時話，籌得嘅款項將會用喺支援樂施會全球各地項目，包括幫助受極端天氣影響嘅本地基層及各地災民。

今屆新參加者有2128人，佔總數七成以上。樂施會話，企業團隊人數創疫情後新高，有1132人。最年長參加者82歲，最年輕嘅係18歲。曾參加多屆毅行者嘅「毅行先生」陳國強話，留意到今次有唔少「生力軍」參加，提醒佢哋要留意隊友狀態、補給分量等，遇到較辛苦嘅路段如雞公山、馬鞍坳等時，就要互相調節速度。