【Emily】高中陝西團下月照去 議員唔隨行

【明報專訊】立法會教育事務委員會原本下月初會跟學生團去陝西考察，了解高中公民與社會發展科嘅內地考察活動安排，但上周內務委員會討論相關撥款時，部分議員對活動嘅日期同地點等提出質疑。教育事務委員會主席梁美芬（Priscilla）噚日喺facebook引述教育局話，百幾人學生團好難改期，決定畀學校如期出發，議員就唔去。

Priscilla同Emily講，對結果有啲失望，今次考察團問過秘書處批准，地點亦係經過多次討論得出，工作繁忙嘅議員亦係抽時間去，但理解百幾人嘅學生團的確好難改期，學生返嚟又要考試。佢話覺得可惜，好多有教育背景嘅議員都好希望睇一次內地考察團係點，教育事務委員會近期開會都冇人有意見，委員好清楚個團嘅性質，「嗰日（內會）嘅意見係第一次聽」。

Priscilla話覺得部分內會議員唔係好理解個團嘅性質，認為佢哋唔應該要人加插啲嘢；至於會唔會補搞，佢話要睇教育局。佢又話?家唯有用其他形式跟進公民科，例如睇報告或者去學校交流，「呢個就唔使內會批」。