【Emily】夏寶龍深圳晤3副司長 葉文娟帶30官赴北京南京研國情

【明報專訊】港澳辦主任夏寶龍南下深圳，繼日前會見英資太古集團行政總裁施銘倫一行，港澳辦噚日再公布下午會見咗港府3名副司長，即政務司副司長卓永興、財政司副司長黃偉綸、律政司副司長張國鈞，但就無透露會面內容。

歷來最大研修班

近期港官頻密北上，政府噚日公布，行政長官辦公室主任葉文娟將喺嚟緊周日（19日）率領超過30個政治委任官員去北京同南京，參加國家事務研修課程同考察，話今次係本屆政府上任後，首次舉行嘅「政治委任官員國家事務研修班」，亦係歷年來同類研修班規模最大嘅一次。研修及考察團由葉文娟做團長，保安局副局長卓孝業做副團長，共有13個副局長、19個政治助理參與。團員抵京後會到國家行政學院學習，11月23日轉抵南京考察，25日返港，團員將深入認識國家歷史同憲法，了解國家喺創新科技、智慧城市、環保生態、文旅產業等方面嘅發展。