【Emily】經民聯「安居三部曲」 倡重建24屋邨

【明報專訊】早前本報報道政府擬重建彩虹邨，經民聯噚日提出「全民安居三部曲」，建議之一正係加快公屋重建。主席盧偉國促請政府分階段重建全港24個舊屋邨，預料可提供14.2萬個單位，較現有嘅10.25萬個多近四成。

經民聯提出7個建議，包括設計重建KPI（關鍵績效指標），爭取10年內先啟動重建12個屋邨；爭取原區安置；透過簡約公屋接收重建屋邨嘅居民；推出發展商參建計劃；以組裝合成加快建屋進度；盡用地積比放寬重建後嘅公屋高度限制；以及由房委會同房協展開策略性重建項目。

另提樓市辣招管理三無大廈

「三部曲」另外兩部分別針對樓市「辣招」同「三無大廈」管理。經民聯副主席林健鋒建議政府，喺今次《施政報告》宣布減辣後，若樓市未來數個月都未見炒風，就應盡快全面「撤辣」，讓樓市健康發展。另一副主席梁美芬建議進一步推動「聯廈聯管」，由政務司長督導誇部門小組制定相關政策，協調單幢舊樓共同聘用一間物業管理公司管理。