【Emily】田北辰白內障手術 指定林順潮操刀

【明報專訊】實政圓桌立法會議員田北辰噚日出席立法會時，右眼包上紗布變「獨眼龍」。佢同Emily講因為前日做白內障手術，所以包上眼罩同紗布，講稿嘅字體都要放大先睇到。手術由同為議員嘅眼科醫生林順潮操刀，田二少話慶幸?家做手術唔使打麻醉針，「如果冇啲好強嘅眼藥水麻醉，我諗我乜都睇唔到都唔會做（手術）」。

拖字訣 話唔做手術最安全

田二少話幾年前已被診斷患有白內障，「我嘅人生觀，呢啲嘢唔到最後就唔整，因為始終（唔做手術最）安全」，所以「死拖」到近期視力「矇查查、乜都睇唔到」，先決定做手術。佢話今次指定由林順潮操刀，因為認識對方多年，前日先做右眼手術，下星期做埋左眼。

講到做手術，田二少話好怕打麻醉針，慶幸現時醫學昌明可以滴眼藥水麻醉，仲話如果要打針寧願唔做手術。包上紗布後因為不能戴眼鏡，田二少會上發言嘅講稿都要放大字體。佢噚日關注最近政府工地屢次發生工業意外，提到公屋地盤開始採用「智慧工地安全系統」，建議當局強制所有地盤使用，以科技防止意外。