【Emily】旅局料全年旅客破3000萬 冬日巡禮有水上煙火

【明報專訊】旅發局噚日公布10月初步訪港旅客數字大約有346萬人次，今年1至10月訪港旅客人次有約2680萬，後者係2018年同期嘅51%，旅發局話數字超出今年初嘅預計，總幹事程鼎一話，旅發局之後嘅連串活動有助吸引更多旅客訪港，有信心全年旅客數字將會超過3000萬人次。

首10月訪港客為2018年51%

旅發局又話，東南亞市場復蘇強勁，相比2017同2018年同期，來自菲律賓同泰國嘅旅客量都已經恢復超過90%。

旅發局將於下星期五（24日）至明年元旦推出「香港繽紛冬日巡禮」，仲會喺12月9號起，連續3個周末同橫跨聖誕節假期，上演8場10分鐘嘅維港水上煙火，到時每晚8點都可以見到聖誕節同禮物等圖案嘅煙火，閃爍維港上空。

「香港繽紛冬日巡禮」嘅海濱聖誕小鎮亦會換上新裝飾，本月24號起喺西九文化區藝術公園海濱草坪登場；當中設置嘅「巨型聖誕樹」超過20米高，相等於逾6層樓，樹身掛滿幻彩燈飾，樹頂有巨型閃耀五角星點綴。