【Emily】公屋機械人助清潔巡邏 劉國勳倡增與邨民互動

【明報專訊】《施政報告》提出智慧屋邨管理，房委會明年會挑選10條公共屋邨做試點，引入創新科技，例如利用物聯網感測器、人工智能、行動裝置等，幫助日常屋邨管理。民建聯劉國勳噚日同房屋局副局長戴尚誠去咗粉嶺皇后山邨，了解引入唔同機械人嘅情况，例如「小清」、「小保」分別負責邨內清潔同巡邏。

劉國勳話呢類機械人有助減輕前線人員嘅工作，例如小清可以減少清潔人員喺炎熱天氣下戶外工作等。佢亦喺現場向政府提出點樣提升機械人嘅日常運作功能，加強同邨民互動，全方位採用科技幫助屋邨管理等建議。

入境處App可睇8口岸實時人流

劉國勳又話，每逢周末及公眾假期結束時，各口岸都擠滿返港嘅人，佢噚日代入境處公布，政府接納建議，喺「香港入境事務處」App內，可以睇到8個陸路口岸嘅實時人流狀况，咁大家可以按情况諗下喺邊度過關喇。