【Emily】感謝馬貝利申落戶 孫玉菡：體藝文人才都重要

【明報專訊】NBA同CBA名宿馬貝利（Stephon Marbury）前日喺人才服務辦公室陪同下受訪，宣布遞交咗高才通申請。推動「搶人才」嘅勞福局長孫玉菡，當日有同馬貝利見面，話感謝佢選擇香港為發展嘅下一站，相信佢一定幫到年輕人喺籃球同人生得到啟發，對方來港正好反映香港機遇處處，係個能夠吸引多元人才發展嘅地方。

孫玉菡仲話第一次同籃球球星見面，形容馬貝利平易近人，即使退役多年，言談之間依然不減對籃球嘅熱情，亦表示有為港貢獻嘅決心。

高才通計劃去年底至上月底已收到近5.5萬宗申請，超過4.3萬宗獲批，主要係創科、金融同貿易人才。孫玉菡話香港係個多元嘅國際都會，需要多方面人才，體育、文化同藝術產業都係城市邁步嘅重要支柱。