【Emily】金融峰會要到場記者睇直播 記協促金管局檢討

【明報專訊】Emily先前報道過，金管局舉辦金融峰會期間安排文字記者睇直播，記者亦唔能夠即場邀約嘉賓訪問，要預約，做法引起行家微言。香港記者協會日前致函金管局，對採訪安排深表遺憾，認為限制採訪自由同妨礙記者履行職責，促請金管局檢討。

記協喺信中話，懇請金管局唔好假設與會者唔肯接受採訪，又話如果當局只係希望傳媒根據直播嚟報道，根本就唔使叫記者到場採訪。記協又呼籲日後容許記者現場採訪。

局方：嘉賓增1/3 難容文字記者入場

金管局回覆記協時重申，由於嘉賓人數超過350，較舊年多咗三分之一，所以唔可以好似舊年咁安排文字記者入場。

金管局又話，現場有位置畀預先邀約嘅傳媒訪問嘉賓，中外傳媒在場做咗超過30場預約嘅專訪。Emily睇番當日有唔少訪問係美國財經頻道CNBC同彭博採訪。

金管局話已盡力配合採訪訴求，認為峰會安排考慮與會者、傳媒同其他嘉賓嘅唔同需要，樂見去年同今年嘅峰會均成功舉行，深受各界歡迎。