【Emily】亂拋垃圾等罰款可網上繳交

【明報專訊】政府上月22日起提高公眾地方亂拋垃圾等定額罰款，食環署噚日公布截至周日（12日），新罰則生效3周內發出咗1248張罰款通知書，其中逾八成、過千張涉及亂拋垃圾。電子繳費系統更新後，被罰款嘅市民可以用定額罰款通知書上列明嘅多種電子方式繳交罰款，不過各間銀行就仍然陸續更新緊網上繳款系統。

銀行系統仲更新緊

提高罰則後，公眾地方亂拋垃圾、吐痰等定額罰款金額增至3000元，店舖阻街等定額罰款就增至6000元。食環署數據顯示，過去3周發出嘅1248張告票中，有1039張涉亂拋垃圾，其次係未經准許展示招貼或海報，佔103張，而隨地吐痰、店舖阻街分別有55同50張，其餘1張涉海上棄置廢物。

食環署話，市民可以選用貼有「繳費服務」標誌嘅銀行自動櫃員機、繳費靈、電話理財服務等電子方式交罰款，亦可郵寄支票、匯票、本票或親自到郵政局交錢，而各間銀行正陸續更新網上繳款系統。署方話之前喺系統更新期間已提醒咗受影響市民，仍未交罰款會收到通知書，上面寫有現時可用嘅繳款方法。