【Emily】謝展寰：牀蝨木蝨臭蟲實為一物 牀蝨對人體影響細過蚊

【明報專訊】立法會食物安全及環境衛生事務委員會噚日開會，討論到防止牀蝨輸入本港。環境及生態局長謝展寰發言時就先講科普，話外地發現嘅「牀蝨」，其實香港一直叫「木蝨」，估計翻譯為「牀蝨」可能因為外國叫佢哋「bedbug」，其實都係「木蝨」，而學名係「臭蟲」，呢3個名所指嘅係同一樣嘢。佢仲話請教過醫衛局，木蝨唔會傳播病毒，對人體影響仲細過比蚊叮，「睇醫生都唔需要㗎」，叫大家唔好太擔心。

話寒帶少見就引起關注

謝展寰又話，木蝨喺熱帶同亞熱帶地方好常見，寒帶就較少，所以喺寒帶地方突然出現大量木蝨就引起好大關注，「可能佢哋處理經驗較少」。

謝展寰話木蝨喺香港唔係新鮮事物，一直有防禦措施，有好多經驗去處理。政府知道外國爆緊木蝨，可能透過旅客、飛機、輪船等傳入香港，已迅速採取行動，業界喺機場、鐵路、酒店同郵輪碼頭有恆常防治蟲害措施，例如加強同更頻密咁清潔消毒，好有信心有能力同措施去預防蟲患輸港。

謝展寰話已向政務司副司長卓永興匯報，副司長前日主持咗會議，指導跨部門強化防止蝨患輸入。