【Emily】首位華人市政局主席 記錄香港變遷 張有興藏品捐中大

【明報專訊】市政局首位華人主席張有興上年初離世，女兒張天愛將爸爸多年藏品捐贈中文大學，噚日簽署協議。藏品包括5箱橫跨半世紀嘅資料，包括畀英國時任首相戴卓爾夫人及馬卓安嘅信函、逾150封張有興同主要政府機構溝通嘅信函、20多冊立法局和市政局會議紀錄等，仲有《中英聯合聲明》同《基本法》相關出版物，以及香港回歸活動邀請函，折射唔同時代嘅香港政制發展、社會民生等情况。

中大圖書館特藏主任李敬坤介紹話，呢批資料對於了解張有興嘅生平和社會貢獻以至當年嘅香港議會活動，有非常重要嘅參考價值，例如顯示張有興對提供港人居英權、興建新機場等多項重大政策嘅支持。李話，預計下年第一季完成建立藏品詳細目錄，並向公眾開放；藏品亦會被數碼保存，畀世界各地嘅研究者閱覽。

張天愛致辭話，爸爸熱中改變同解決問題，形容佢係香港社會包容同進步嘅典範，希望捐贈藏品可以將爸爸嘅歷史保存，亦畀大眾記得佢嘅理念。中大副校長（行政）及秘書長吳樹培感謝張有興家人慷慨捐贈，承諾會妥善保管資料，發揮研究香港歷史嘅重大意義。