Emily Online｜何永賢撐夜繽紛  觀塘海濱跳拉丁 (22:37)

政府繼續喺海濱搞「夜繽紛」活動，官員都身體力行動支持。房屋局長何永賢就話要「work life balance」，收工要放鬆，周五晚去咗佢以前工作過嘅觀塘海濱，參加「拉丁之夜」，仲喺拉丁舞老師稍稍指導下，同管理海濱嘅團體藝土民間主席楊肇珊跳拉丁舞嘅最基本舞步，Emily見佢扭吓腰伸吓腿，都幾投入。何永賢話，當晚欣賞咗一眾優秀舞者同非常高水平嘅樂隊演出，又話觀塘海濱係市民可以好好休息消閒嘅地方。

同晚同場仲有另一名局長喺度「夜繽紛」，政制及內地事務局長曾國衞同副局長胡健民，喺夜繽紛嘅攤位宣傳區議會選舉，鼓勵市民12月10日踴躍投票。何永賢話佢都去咗攤位湊熱鬧，一齊喺攤位影相及呼籲市民投票。睇番發展局網頁介紹，未來兩周末喺觀塘或堅尼地城海濱都會有夜繽紛活動舉辦。