【Emily】議員工作忙 姚柏良鄭泳舜代表立會渡海泳

【明報專訊】「新世界維港泳」年年都吸引唔少政界名人參加，今年繼續有立法會議員姚柏良同鄭泳舜，Emily睇番舊相，上年嘅「立法會飛魚小隊」仲有容海恩，同多名議員「啦啦隊」，但今年部分人唔見蹤影。姚柏良解釋話議員工作忙，加上最近好多落區宣傳工作，但大家又想做好準備先參加，故今次由佢同鄭泳舜代表立會。

講到渡海過程，鄭泳舜話雖然天陰陰，好在水溫都暖，但覺得水流較急，難游過上年，游咗近45分鐘，比預期多10分鐘，可能游歪咗，故游咗1.3K。阿舜話佢參加「優悠組」，大家都好客氣，慶幸無中腳，都飲咗幾啖海水；又讚今年參加者大增，運作流程井井有條。

姚柏良就話，大家一齊望住Rosewood酒店游，方向清晰，游得好開心。佢亦提到活動帶動香港嘅體育氣氛，亦證明咗香港嘅游泳事業同游泳運動員嘅發展。

會計界前議員梁繼昌都有份游，佢喺facebook話水溫好舒服，水質比往年好，近星光大道海域已冇惡臭，希望出年完成時間可推前啲。意大利駐港總領事費文浩都有落水游埋一份。