【Emily】特首辦廚師要考基本法國安法 起薪$30870

【明報專訊】各行各業都鬧「人才荒」，唔少公司出現流失，但又好難請人，就連政府都唔例外。政府唔同部門不時都有職位空缺，最近特首辦同政務司長官邸都登招聘廣告請廚師，起薪點分別30,870元同22,895元。睇番招聘廣告，特首辦廚師嘅入職條件，除要有一定程度嘅廚師經驗，都要識基本電腦文書處理，並要喺《基本法及香港國安法》測試及格，獲聘者會按公務員合約條款聘任3年。

至於政務司長官邸聘請嘅係合約助理廚房（唔係公務員），唔需要考基本法及國安法測試，但應徵者要通過技能測試。特首辦要求應徵者操流利粵語同簡單英語，但政務司長官邸就要應徵者識埋簡單普通話，獲聘者按非公務員合約條款聘任兩年。

政府上年公布，所有喺上年7月1日或之後入職嘅公務員，不論職級或工種，入職條件都包括《基本法及香港國安法》測試及格。