【Emily】旅發局×菲泰韓導演 拍微電影宣傳香港

【明報專訊】旅發局近日推出《亞洲名導的香港景深》系列，由來自菲律賓、泰國、韓國嘅導演創作3套以香港為主題嘅微電影，噚日喺本港公映兩場後，今個月起會陸續喺馬尼拉、曼谷、首爾首映，並會喺亞洲區內電視同網上串流平台播放。旅發局總幹事程鼎一話期望用鏡頭展示香港多元化旅遊體驗，並喺呢3個主要亞洲旅客市場，以電影場景宣傳本港。

微電影片長共約一小時，亦係「香港亞洲電影節2023」參展電影。其中《姊妹》邀請咗泰國電影《出貓特攻隊》嘅導演拍攝，講述泰國姊妹來港尋找病重爸爸嘅舊情人，其間游走港島多間特色酒吧。《緣份擲公字》關於菲律賓男孩邂逅來港尋找真愛嘅少女，場景橫跨西九文化區M+等藝文景點。至於講述女主角從韓國穿越到香港嘅《香港．夢旅情》就喺港式茶餐廳「大安茶冰廳」拍攝。

根據旅發局數據，撇除內地及澳門遊客，今年首9個月短途地區市場約有229萬旅客人次訪港，其中菲律賓、泰國及韓國旅客分別約47萬、28萬及22萬人次，排名第二、第三及第五。至於榜首嘅台灣則約有54萬人次，佔短途地區市場約23%。