【Emily】助人才落地生根 特首盼港漂做「媒人」

【明報專訊】特首李家超噚日出席香港高才通人才服務協會創立暨首屆理監事會就職禮，講到要鼓勵人才留港持續發展嘅時候，建議在場「港漂」向新來港人才介紹男朋友或女朋友，等佢哋可以「落地生根」，貢獻香港，最後仲祝願各人才在港一帆風順，「百子千孫」。

李家超致辭時話，協會創立宗旨係推動高端人才融入香港，順利就業、創業、生活，最後結婚生仔同買樓。佢向協會提出3個寄望，第一係同「香港人才服務辦公室」合作，為新來港人才提供實用資訊，第二係希望在場嘅「港漂」協會代表向新來港人才分享經驗，亦介紹男女朋友畀佢哋識；最後係積極推廣香港獨特機遇，吸引更多人才來港。

首10月7萬人才到港 多目標一倍

至於「高端人才通行證計劃」等輸入人才計劃嘅進度，李家超話今年頭10個月，各項計劃有超過18萬宗申請，當中超過11萬宗獲批，其中「高才通」收到約5.5萬宗申請，超過4.3萬宗獲批，而至今有7萬人才到港，較原訂目標多一倍。