【Emily】紐約跑全馬 狄志遠拖住痛腳返港開會

【明報專訊】年逾60嘅新思維狄志遠（圖）一向鍾情馬拉松，不時去海外參賽。日前佢就去咗「世界六大馬拉松」之一嘅紐約馬拉松跑「全馬」，喺當地時間周一（5日）比賽完，隨即搭飛機返香港開會。狄志遠同Emily講，早排忙於工作，唔夠時間練跑，結果比賽到尾段時，跑得特別辛苦。

狀態唔好 最後5公里「跑極唔完」

狄志遠話，一般跑「全馬」去到最後5公里時，都有種「好快到終點」嘅感覺，但今次狀態唔好，最後5公里反而覺得「跑極都唔完」，仲形容當時雙腳可以痛嘅地方都痛，慶幸係身體狀况還好，未至於頭暈唔舒服，總算完成賽事。

前日（周二）立法會教育委員會狄志遠都有出席發言，原來當日佢一落機就返立法會，仲因為腳痛，要用行李篋借力行路，不過休息一日後，噚日佢話已經好好多，只係雙腳有少少肌肉痛，仲想跑幾公里幫助復元。