【Emily】會場攝記限定 文字記者金融峰會睇直播

【明報專訊】金管局今年第二年舉辦國際金融領袖投資峰會，地點係中環四季酒店，噚日除咗攝影記者同兩大美國財經頻道，大部分到場嘅文字記者只可以留喺傳媒中心入面隔住屏幕睇直播。有行家同Emily訴苦，話去到嘉賓所在嘅主會場時，即刻畀工作人員「人盯人」請走；有嘉賓想去記者所處嘅樓層搵記者打個招呼，都一度畀工作人員阻止。

金管局：場地所限 設傳媒採訪區

舊年峰會喺疫情尾聲舉行，當時部分記者入得會場，喺指定位置聽演講。根據今年大會傳媒指引，文字記者唔可以進入宴會廳樓層，訪問要提前申請，唔可以喺今年嘉賓樓層邀約訪問，如有違反，大會有權即時取消採訪資格，仲可能一段時間唔會獲邀出席金管局活動。

今年峰會嘅嘉賓由200幾人增至超過300人，確係多咗。金管局回覆Emily查詢時話，考慮場地所限，大會安排攝影記者進入會場，文字記者就被邀請喺傳媒中心睇直播，傳媒中心外亦設有傳媒採訪區。