【Emily】同運會麻將初賽打六輪 有人太攰早退

【明報專訊】旨在推動多元共融嘅同樂運動會（Gay Games）日前喺香港開幕，噚日踏入第3日，多項賽事上演，包括最具本地特色嘅麻將同划龍舟比賽。麻將初賽中午開始，參加者要打牌打六輪到夜晚10點，累計積分，達一定排名就可以進入複賽。Emily所見現場好熱鬧，唔少枱都有外籍參加者打牌，不過去到7點幾，有選手話同枱有人打牌打到太攰要提早離場，空位由義工頂替。

噚日仲有多項比賽，包括7人足球賽喺烈日下上演。活動期間不時見到參加者帶彩虹旗，亦有參加者帶小朋友參與活動，喺草地上野餐。

同運會第一次嚟到亞洲，活動氣氛熾熱，吸引咗世界各地嘅人來港參與，但近期就引起部分立法會議員同民間團體反對。平機會主席朱敏健噚日出席另一活動時就回應話，任何活動性質合乎推動多元共融、社會和諧，都合乎平機會嘅目標，平機會會支持活動。佢亦相信政府會支持香港唔同領域嘅多元共融，包括性小眾權益。