【Emily】孫中山誕辰 紀念館下周末免費同樂日

【明報專訊】11月12日係孫中山嘅誕辰，位於中環半山嘅孫中山紀念館將會喺下個周末一連兩日（11日及12日）舉行免費同樂日，會有唔同類型嘅活動，希望增進參觀者對孫中山嘅認識。喺孫中山誕辰當日就會有「孫中山先生誕辰」絨球花製作工作坊，仲有雕塑家朱達誠主講「孫中山先生銅像與我」專題講座，參觀者可從唔同角度了解孫中山。

紀念館嗰兩日都會有有關孫中山生平事迹嘅問答小遊戲，參觀者只要喺館內嘅常設展覽「孫中山時期的香港」同「孫中山與近代中國」就會搵到答案，答啱可以換取紀念品。

有專題講座音樂匯演問答遊戲

紀念館亦會透過音樂匯演同中國傳統雜耍體驗，畀參加者透過中樂、舞蹈和口琴等，認識孫中山嘅生平事迹等，現場仲會設有鑄幣機，可以製作紀念幣。