【Emily】新一份財案明年2‧28出爐

【明報專訊】特首李家超啱啱公布完《施政報告》，好快就輪到財政司長陳茂波公布新一份《財政預算案》。最新立法會文件公布2024年嘅會議安排，其中明年2月28日將公布預算案，相關公告下周五（10日）刊憲；政府預計有關預算案嘅撥款條例草案將於明年5月8日表決。

至於本年度會期將喺下個月13日結束，之後休會，而新一個年度嘅立法會就會喺明年1月10日展開，亦係改制後立法會「下半場」嘅開始。

另外，噚日嘅立法會內務委員會上，內會主席李慧琼匯報與政務司長陳國基會面嘅情况，佢引述陳國基話感謝議員支持《施政報告》，其中報告提出一系列鼓勵生育嘅政策，李慧琼引述陳國基話，政務司副司長卓永興將牽頭帶領相關政策局官員，出席本月21日舉行嘅人力事務委員會做政策簡報。

陳國基「放話」議員「識做」 減股票印花稅月中恢復二讀

《施政報告》亦提出降低買賣住宅嘅相關印花稅同股票印花稅，李慧琼引述陳國基話，希望議員支持並盡快完成審議有關法案，而噚日議員們都好「識做」，未就相關法案提出召開法案委員會，所以有關減股票印花稅嘅法案將會喺本月15日恢復二讀及三讀。