【Emily】屹港之巔 觀雲測雨 廿載波波 功成下山

【明報專訊】大帽山頂嘅球形雷達係好多山友打卡嘅重要「景點」，但呢個服務香港24年嘅雷達近日退役，今個月會拆卸。天文台近日喺社交平台發帖，告別呢個屹立喺本港最高山峰嘅「多普勒天氣雷達」（TDWR）。帖文話雷達運作以來，最大嘅挑戰係2018年超強颱風山竹襲港時，雷達站內嘅玻璃被吹毁，雨水不斷湧入，天文台讚揚維護雷達嘅同事當時緊守崗位，雷達先可以持續運作。

山竹最大挑戰 爆玻璃湧雨水

天文台仲為雷達拍攝告別短片，背景音樂專登揀咗首有關道謝嘅歌曲，喺「熄機」一刻，仲聽到有職員同雷達講：「Goodbye and thank you！」而大帽山之後會安裝一個更先進嘅新雷達，透過新科技提高監測天氣嘅能力。

天文台喺2019年立法會財委會文件提到，香港有兩部風暴探測天氣雷達，涵蓋熱帶氣旋、雷暴、暴雨、水浸、山泥傾瀉等方面，以掌握惡劣天氣嘅移動及強度變化。大帽山呢部將會拆嘅天氣雷達，由於好多重要零件已停產，所以需要整個更換，而另一部喺大老山嘅雷達，2015年已更換咗新款，同大帽山即將安裝嘅新雷達功能相若，包括備有「雙偏振」功能，日後估算降雨強度都會更準確。