【Emily】今起3日堅城夜市可帶毛孩 灣仔海濱搞水上活動嘉年華

【明報專訊】灣仔海濱嘅「濱紛魔法嘉年華」結束後，發展局噚日宣布今個月各個海濱繼續有唔同活動，其中堅尼地城卑路乍灣海濱今日起至周日，每日下午3點至夜晚11點會舉辦「堅農夜市．寵物世界」活動，除咗有拉丁舞表演，仲設有寵物領養及義工分享會，市民可以帶埋寵物一齊去玩。

灣仔海濱水上運動及康樂主題區亦會喺聽日同後日舉辦「水上活動競技日『We划』海洋嘉年華2023」，重點項目包括聽日嘅夜間限定版「直立板瑜珈體驗」，市民要喺網上報名先玩得㗎，Emily噚日傍晚6點睇過，所有名額已滿，其他水上活動嘅名額亦近乎爆滿。不過，玩唔到水上活動都唔緊要嘅，4個《造星V》嘅參賽者會喺聽晚7點半至9點半現身busking。

至於觀塘海濱，下周五（10日）夜晚7至11點將有「拉丁之夜」活動，現場有拉丁樂隊、拉丁舞表演及芭恰塔舞工作坊；「韓流舞蹈派對」活動就會喺下周六（11日）舉行，到時市民可以睇韓流舞蹈表演，同埋K-pop隨機舞蹈。兩場活動現場都會有小食及飲品攤檔。