【Emily】港大圖書館111歲 抗日館長日記擬電子化

【明報專訊】香港大學圖書館今年111歲生日，校方趁噚日11月1日搞晚宴，主題係「111 Dreams」（111個夢想），港大首席信息主管及大學圖書館長伍麗娟（Flora）邀請多名港大生同嘉賓以1分鐘分享自己嘅夢想，本身係高山滑雪運動員嘅港大生翁厚全話夢想係再戰奧運；華人探險家黃效文就希望幫珍貴嘅舊書「尋家」，希望港大圖書館收留多啲罕有圖書。

最快年底收原稿 料一兩年處理

Flora透露，最新計劃係將抗日時期嘅港大馮平山圖書館長陳君葆嘅日記復修同逐頁電子化。館方話，日記以一手資料角度記載抗戰時期香港淪陷情况，記載港人當時生活艱難、有人餓死等，希望電子化工作令更多讀者了解呢段歷史；又話有別於以往出版社已推出嘅版本，港大想保留日記較完整同全面嘅內容。館方又話，最快今年底收到日記原稿，預計用一兩年處理。

Flora話，為咗支持港大圖書館將館藏電子化，歡迎大家捐款，仲講笑話「因為自己同港大簽嘅合約仲有3年時間，歡迎大家3年內隨時捐款」。