【Emily】「夜遊票」港人$100旅客$20 城巴觀光巴被鬧歧視

【明報專訊】城巴為響應「香港夜繽紛」活動，今日起至2024年1月31日會開辦「人力車觀光巴士」特別夜景路線H2K，每晚7點到10點由中環天星碼頭開出，途經港九多個熱門地點，不過收費就引起不滿。事緣城巴設有100元嘅「夜遊票」，乘客可同一晚無限次乘搭H2K路線，但同一張票遊客只需要20元，有本地網民批評做法「歧視港人」。

旅發局發言人噚日回覆Emily話，旅客優惠價會維持3個月，目的係吸引訪港旅客欣賞香港夜景同豐富遊客嘅旅遊體驗。

旅發局：優惠維持3個月 目的吸訪客

H2K單程收費41.8元，另設有100元「夜遊票」，一晚之內可無限次乘搭H2K路線，而旅發局為吸引遊客，遊客憑證明文件到中環天星碼頭嘅人力車觀光巴士票務站或旅發局九龍旅客諮詢中心，就可以用20元買「夜遊票」。H2K喺中環碼頭開出，途經灣仔海濱長廊、西九文化區、尖沙嘴鐘樓等，最後返去中環碼頭。

「人力車觀光巴士」同時設有H1同埋H2兩條日間路線，途經荷李活道、銅鑼灣、金紫荊廣場、尖沙嘴碼頭等旅遊景點，乘客都可以用200元買全日票，全日無限次搭H1、H2同H2K路線。